حه‌فت مادده‌ی تر له‌ په‌یڕه‌وی ناوخۆی په‌رله‌مان په‌سند كران

06/10/2015 02:31:00 م
دانیشتنه‌كانی په‌رله‌مان بۆ گفتوگۆكردن ‌و په‌سندكردنی مادده‌ و بڕگه‌كانی پڕۆژه‌ی په‌یڕه‌وی ناوخۆ به‌رده‌وامییان هه‌یه‌، سه‌عات 11ی پێشنیوه‌ڕۆی ئه‌مڕۆش 2015/10/6، به‌ سه‌رۆكایه‌تیی د.یوسف محه‌مه‌د صادق سه‌رۆكی په‌رله‌مانی كوردستان ‌و ئاماده‌بوونی د.جه‌عفه‌ر ئیبراهیم ئێمینكی جێگری سه‌رۆكی په‌رله‌مان ‌و فه‌خره‌دین قادر عارف سكرتێری په‌رله‌مان، دانیشتنى ژماره‌ (5)ى ئاساییی خولى پاییزه‌، ساڵی دووه‌م له‌ خولــی چواره‌مى هه‌ڵبژاردن به‌ڕێوه‌چوو. 
 سه‌ره‌تا سه‌رۆكی په‌رله‌مان به‌رنامه‌ی كاری دانیشتنه‌كه‌ی خوێنده‌وه‌، كه‌ بریتی بوو له‌ به‌رده‌وامبوون له‌سه‌ر گفتوگۆكردنى په‌یڕه‌وى ناوخۆى په‌رله‌مانى كوردستان، كه‌ له‌لایه‌ن لیژنه‌ى كاتى بۆ پێداچوونه‌وه‌ى په‌یڕه‌وى ناوخۆ ئاماده‌كرابوو، به‌پێى بڕیارى ژماره‌ (26)ى ساڵى 2014 و بڕگه‌ى (8) له‌ مادده‌ى (په‌نجا و شه‌شه‌م)ى یاساى هه‌ڵبژاردنى په‌رله‌مانى كوردستان، ژماره‌ (1)ى ساڵى 1992 هه‌مواركراو و پاڵپشت به‌ مادده‌ى (94)ى په‌یڕه‌وى ناوخۆى په‌رله‌مانى كوردستان، ژماره‌ (1)ى ساڵى 1992ى هه‌مواركراو. 
دوای ئه‌وه‌ی له‌ دانیشتنی پێشوودا مادده‌ و بڕگه‌كانی به‌شی چواره‌می پڕۆژه‌كه‌، كه‌ تایبه‌ت بوون به‌ ئه‌ندامییه‌تی و ئه‌رك ‌و مافه‌كان و پارێزبه‌ندی واته‌ حه‌سانه‌ی په‌رله‌مانیی ئه‌ندامان، له‌لایه‌ن په‌رله‌مانتارانه‌وه‌ گفتوگۆیان له‌باره‌وه‌ كرا ‌و چه‌ندین سه‌رنج ‌و تێبینی ‌و پێشنیاز بۆ ده‌وڵه‌مه‌ندكردنی زیاتری خرابوونه‌ روو، له‌ دانیشتنی ئه‌مڕۆدا سه‌رجه‌م مادده‌كانی ئه‌و به‌شه‌، كه‌ له‌ مادده‌ی 21ه‌وه‌ ده‌ستپێده‌كات ‌و به‌ مادده‌ی 27 كۆتایی دێت، له‌لایه‌ن سه‌رۆكی په‌رله‌مانه‌وه‌ ئه‌و پێشنیازانه‌ی كه‌ له‌لایه‌ن سێ ئه‌ندامه‌وه‌ پشتگیرییان لێكرابوو،له‌ رێگه‌ی خستنه‌ ده‌نگدانه‌وه‌ یه‌كلاییكرانه‌وه‌ ‌و چه‌ند بڕگه‌یه‌كیش بۆ چه‌ند مادده‌یه‌كی به‌شه‌كه‌ به‌ رێگه‌ی ده‌نگدان زیادكران ‌و لادران، سه‌رجه‌م مادده‌كانی به‌شه‌كه‌ دوای سه‌رله‌نوێ داڕشتنه‌وه‌یان له‌لایه‌ن لیژنه‌ی كاتی بۆ پێداچوونه‌وه‌ به‌ په‌یڕه‌وه‌كه‌، به‌ جیا خرانه‌ ده‌نگدانه‌وه‌ ‌و په‌سندكران.
ئه‌و ماددانه‌ی كه‌ له‌ ژێر ئه‌و به‌شه‌دا هاتبوون، تایبه‌ت بوون به‌ ئه‌ندامییه‌تی له‌ رووی دروستی ‌و ئه‌ركه‌كانی ‌و مافه‌كانی ‌و پارێزبه‌ندیی په‌رله‌مانی ‌و نه‌مانی ئه‌ندامییه‌تی چ به‌ كۆتاییهاتنی بێت یان ده‌ستله‌كاركێشانه‌وه‌ یاخود له‌ ده‌ستدانی ئه‌ندامییه‌تی بێت له‌و حاڵه‌تانه‌ی كه‌ له‌ په‌یڕه‌وه‌كه‌دا دیاریكراون. 

رۆژمێرى رووداوه‌كان