لیژنه‌ی ناوچه‌ كوردستانییه‌كان هه‌وڵی كردنه‌وه‌ی ڕێگه‌ی نێوان هه‌ولێر – كه‌ركوك ده‌دات

17/07/2018 08:00:00 م
سه‌رله‌به‌یانیی ئه‌مڕۆ 17/7/2018، لیژنه‌ی ناوچه‌ كوردستانییه‌كانی ده‌ره‌وه‌ی ئیداره‌ى هه‌رێمى كوردستان، به‌سه‌رپه‌رشتی شوان شێخ ئه‌حمه‌د، سه‌رۆكی لیژنه‌ و ئاماده‌بوونی جێگرو بڕیارده‌رو ژماره‌یه‌ك له‌ئه‌ندامانى لیژنه‌كه‌ كۆبوونه‌وه‌ی ئاسایی خۆی ئه‌نجامدا.
له‌ كۆبوونه‌وه‌كه‌دا لیژنه‌ تاووتوێی ئه‌و نووسراو و یاداشتانه‌ی كرد كه‌ ئاراسته‌ی لیژنه‌كه‌ كرابوون به‌مه‌به‌ستی به‌دواداچوونیان و لێكۆڵینه‌وه‌ لێیان، به‌تایبه‌ت ئه‌و سكاڵایانه‌ی كه‌ دانیشتوانی دوز ئاراسته‌ی لیژنه‌كه‌ی كردبوون كه‌ داوای ئارامی و خزمه‌تكردنی زیاتر ده‌كه‌ن.
هه‌ر له‌كۆبوونه‌وه‌كه‌دا بڕیاردرا لیژنه‌ نووسراوێك ئاراسته‌ی سه‌رۆكایه‌تیی په‌رله‌مانی كوردستان بكات بۆئه‌وه‌ی له‌ڕێگه‌ی ئه‌وانه‌وه‌ به‌نووسراو داوا له‌ده‌سه‌ڵاتدارانی حكومه‌تی ناوه‌ند بكرێت به‌ ڕێكاره‌ ده‌ستووری و یاساییه‌كان رێگه‌ی نێوان هه‌ولێر- كه‌ركوك بكرێته‌وه‌، كه‌ له‌دوای ڕووداوه‌كانی 16 ئۆكتۆبه‌ره‌وه‌ ئه‌م ڕێگایه‌ به‌ڕووی هاوڵاتییاندا داخراوه‌ و  ئاسته‌نگیی زۆری بۆ هاتووچۆى هاوڵاتییان دروست كردووه‌.

رۆژمێرى رووداوه‌كان